Qiyaam

1. Humarap sa Qiblah.

⁠2. Pagdikitin ang mga paa o ilapit ang mga ito sa isa’t isa hangga’t maaari. Tiyaking nakaharap ang mga paa sa direksyon ng Qiblah.

3. Pagkatapos nito, ilagay sa isip ang intensyon para sa salah na iyong isasagawa at itaas ang iyong mga kamay hanggang sa ang iyong mga hinlalaki ay kapantay ng mga earlobe (ibaba ng tainga) at ang mga dulo ng iyong mga daliri ay kapantay ng itaas na bahagi ng iyong mga tainga.

4. Obligadong bigkasin ang takbeer sa paraang naririnig mo ang iyong sarili.

5. Simulan ang takbeer (Allahu Akbar) sa pamamagitan ng pagtataas ng mga kamay at tapusin ito sa pamamagitan ng pagtiklop ng mga kamay.

6. Kapag itinataas ang mga kamay patungo sa mga tainga, tiyaking nakaharap ang mga palad sa Qiblah at bahagyang magkakahiwalay ang mga daliri. Dapat ay nakalabas ang mga kamay habang itinataas ang mga ito (ibig sabihin, hindi dapat nakatago ang mga ito sa loob ng manggas, balabal, atbp.).

7. Sa oras ng pagbigkas ng takbeeratul ihraam, tiyaking nakatuon ang iyong paningin sa lugar ng sajdah at bahagyang nakayuko ang iyong ulo.

⁠8. Ipatong ang mga kamay sa ibaba ng dibdib at sa itaas ng pusod.

⁠9. Hawakan ang pulso ng kaliwang kamay gamit ang kanang kamay at ilagay ang mga daliri ng kanang kamay sa bisig ng kaliwang kamay.

10. Kapag nasimulan mo na ang iyong salah, bigkasin nang tahimik ang Dua-ul Istiftaah:

وَجَّهْتُ وَجْهِيَ لِلَّذِيْ فَطَرَ السَّمَاوَاتِ وَالْأَرْضَ حَنِيْفًا مُسْلِمًا وَمَا أَنَا مِنَ الْمُشْرِكِيْنَ إِنَّ صَلَاتِيْ وَنُسُكِيْ وَمَحْيَايَ وَمَمَاتِيْ لله ِرَبِّ الْعَالِمِيْنَ لَا شَرِيْكَ لَهُ وَبِذلِكَ أُمِرْتُ وَأَنَا مِنَ الْمُسْلِمِيْنَ

Itinutuon ko ang aking mukha sa Kanya na lumikha ng mga langit at ng lupa, habang nananatili sa tamang landas nang walang paglihis, nang may ganap na pagpapasailalim, at hindi ako kabilang sa mga nagtatambal ng iba kay Allah. Katotohanan, ang aking pagdarasal, ang aking mga ritwal, ang aking pamumuhay, at ang aking kamatayan ay para kay Allah—ang Panginoon ng mga daigdig. Wala Siyang katambal, at ito ang ipinag-utos sa akin, at ako ay kabilang sa mga nagpapasailalim (kay Allah).

11. Bigkasin ang Ta’awwudh. Ang Ta’awwudh ay pagbiigkas ng:

أَعُوْذُ بِاللهِ مِنَ الشَّيْطَانِ الرَّجِيْم

Humihingi ako ng proteksyon kay Allah ta’ala mula sa isinumpang Shaitaan.

Tandaan: Ang Dua-ul Istiftaah at Ta’awwudh ay bibigkasin ng munfarid (ang nagsasagawa ng salaah nang mag-isa) gayundin ng imaam at muqtadi (ang sumusunod sa imaam).

12. Pagkatapos nito, simulan ang pagbigkas (qiraat) ng Surah Al-Fatiha na susundan ng isa pang surah o anumang bahagi ng Qur’an Majeed. Bago simulan ang pagbigkas ng Surah Al-Fatiha, bigkasin ang Tasmiyah dahil ito ay bahagi ng Surah Al-Fatiha.

Ang Tasmiyah ay ang pagbigkas ng:

بِسْمِ اللهِ الرَّحْمٰنِ الرَّحِيْم

Sa ngalan ni Allah, ang Pinakamahabagin, ang Pinakamaawain.

Paalala: Kung ikaw ang Imam, bigkasin nang malakas ang Tasmiyah sa lahat ng jahri salah (mga pagdarasal kung saan binibigkas nang malakas ang qiraat).